ވަޒީރު ދެއްވީ ޓެކްސީ ނަފާގެ ކާރުތަކުގެ މައްސަލައަށް ހައްލެއް ހޯއްދަވައިދެއްވާނެކަމުގެ ޔަގީންކަން

ސޯޝަލް މީޑިއާ ޕްލެޓްފޯމް 'އެކްސް' މެދުވެރިކޮށް އާންމު ރައްޔިތަކު ސިޓީއެއް މެދުވެރިކޮށް ހުށަހެޅި ކަންބޮޑުވުންތަކަށް އިގްތިސާދީ ތަރައްގީއާ ބެހޭ ވަޒީރު މުހައްމަދު ސައީދު ވަގުތުން އިޖާބަދެއްވައި، އެ ކަންކަމަށް އަވަސް ހައްލެއް ހޯއްދަވައިދެއްވާނެ ކަމުގެ ޔަގީންކަން ދެއްވައިފިއެވެ.

ހއ. ދިއްދޫގެ ރައްޔިތަކު "އެކްސް"ގައި އާންމުކުރި އެ ސިޓީގައި ފާހަގަކޮށްފައިވަނީ، ޓެކްސީ ނަފާ ލޯނު ސްކީމްގެ ދަށުން ލިބިފައިވާ ކާރުތައް ރަޖިސްޓްރީ ނުކުރެވި ލަސްވަމުންދާ ކަމަށެވެ.

އަދި ކާރުތައް ރަޖިސްޓްރީ ނުވެ، ވިޔަފާރި ނުފެށި އުޅެނިކޮށް ލޯނު އަނބުރާ ދެއްކުމަށް ބޭންކުން ތަކުރާރުކޮށް ބާރުފޯރުވަމުންދާތީ، ލޯނު ނަގާފައިވާ ފަރާތްތަކަށް ބޮޑެތި ތަކުލީފުތަކެއް ކުރިމަތިވަމުންދާ ކަމަށް އެ ސިޓީގައި ބަޔާންކޮށްފައިވެއެވެ.

މި ސިޓީއަށް ރައްދު ދެއްވައި އެކްސްގައި ޕޯސްޓުކުރެއްވި ސިޓީއެއްގައި ވަޒީރު ސައީދު ވިދާޅުވީ، ސިޓީގައި ފާހަގަކޮށްފައިވާ ކަންކަން އިންސާފުވެރިކަމާއެކު ބަލައި، ކުރިއަށް ދެވޭނެ އެންމެ އަވަސް މަގުތަކާއި ހައްލުތައް ހޯދައިދިނުމަކީ އެމަނިކުފާނުގެ އެންމެ އިސް އެއް ވާޖިބު ކަމުގައި ދެކޭ ކަމަށެވެ.

އަދި މި މައްސަލަތައް ބަލައިދިނުމަށް އެދި ޓްރާންސްޕޯޓް ދާއިރާގެ ކަންކަން ބެލެހެއްޓުމާ ހަވާލުވެ ތިއްބެވި އިސް ބޭފުޅުންނަށް މިހާރު އަންގަވާފައިވާ ކަމަށްވެސް ވަޒީރު ވިދާޅުވިއެވެ.

ވަޒީރު އިތުރަށް ވިދާޅުވީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުގެ އަމާޒަކީ ރައްޔިތުންނާ ވީހާވެސް ގާތުން ހިދުމަތް ދިނުން ކަމަށެވެ.

"ރައްޔިތުންގެ އަޑު އަބަދުވެސް އަހައިގެން، ރައްޔިތުން ހުށަހަޅާ ކަންކަން ގާނޫނާއި ގަވާއިދުތަކުގެ ތެރެއިން ފަހިކޮށްދިނުމަކީ ރައީސުލްޖުމްހޫރިއްޔާގެ ވަރަށް ބޮޑު އެދިވަޑައިގަތުމެއް،" ވަޒީރު ފާހަގަކުރެއްވިއެވެ.

ޓެކްސީ ނަފާ ލޯނު ސްކީމަކީ މާލެ ސަރަހައްދުގައި ޓެކްސީގެ ހިދުމަތް ފުޅާކުރުމަށް ތައާރަފްކުރި ސްކީމެކެވެ. ނަމަވެސް އިދާރީ މައްސަލަތަކާ ހުރެ ރަޖިސްޓްރޭޝަން ލަސްވުމަކީ ލޯނު ނެގި ފަރާތްތަކަށް އާމްދަނީ ހޯދުމަށް އޮތް ހުރަހަކަށް ވެފައިވާތީ، ސަރުކާރުން މިހާރު ވަނީ މިކަމަށް ދާއިމީ ހައްލެއް ހޯދުމުގެ މަސައްކަތް ފަށާފައެވެ.