މަހުދީ ނިޔާވި ޑައިވަކީ ކެޕޭސިޓީ ނެތި ކުރާ ޑައިވެއް ކަމަށް ސިފައިން ރައީސް ގާތު ނުބުނޭ: މުންދު

ވ. އަތޮޅުން ގެއްލުނު އިޓަލީގެ ފަތުރުވެރިން ހޯދުމަށް ސިފައިން ހިންގި އޮޕަރޭޝަނުގައި، ބޭނުންވާ ޓެކްނިކަލް ކެޕޭސިޓީ ނެތް ކަމުގެ އެއްވެސް މައުލޫމާތެއް ސިފައިންގެ ފަރާތުން ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ހިއްސާކޮށްފައި ނުވާ ކަމަށް ރައީސް އޮފީހުގެ ތަރުޖަމާނު މުހައްމަދު ހުސައިން ޝަރީފް (މުންދު) ވިދާޅުވެއްޖެއެވެ.

މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މުންދު ވިދާޅުވީ، ފަސް ޑައިވަރުން ގެއްލުނު ހާދިސާގައި އެ މީހުންގެ ހަށިގަނޑުތައް ހޯދުމަށް ސިފައިންގެ ފަސްޓް ކްލާސް ސާޖަންޓް މުޙައްމަދު މަހުދީ ކުރި ޑައިވަކީ ސިފައިންގެ ކެޕޭސިޓީ ނެތި ކުރި ޑައިވެއް ކަމަށް އެވަގުތު ބުނެފައި ނުވާ ކަމަށެވެ.

އެގޮތުން އެ ދުވަހު ރައީސުލްޖުމްހޫރިއްޔާ އެ ސަރަހައްދަށް ވަޑައިގެން ސިފައިންނާ ބައްދަލުކުރެއްވިއިރު، އެފަދަ އެއްވެސް ޝަކުވާއެއް ނުވަތަ އިތުރު ރިސްކެއް އޮތް ކަމުގެ ވާހަކައެއް ސިފައިން ފާހަގަކޮށްފައި ނުވާ ކަމަށާއި، އެފަދަ ވާހަކައެއް ސިފައިން ބުނީ އެރޭ ޕީއެސްއެމްގެ ޕްރޮގްރާމުގައި ކަމަށް ވެސް މުންދު ވިދާޅުވިއެވެ.

މުންދު އިތުރަށް ވިދާޅުވީ، ކެޕޭސިޓީގެ މައްސަލައެއް ނުވަތަ އިތުރު އެހީތެރިކަމެއް ބޭނުންވާ ވާހަކަ ސިފައިން ވިދާޅުވި ނަމަ، ސަރުކާރުން އެކަން ވަގުތުން ފަހިކޮށްދެއްވާނެ ކަމަށެވެ. އެގޮތުން އިޓަލީގެ ސަރުކާރުގެ އެހީތެރިކަން ހޯދަން ސަރުކާރުން ނިންމީ ރައީސްގެ އެ ދުވަހުގެ ދަތުރުފުޅުގެ ތެރެއިން، އިޓަލީގެ ސަރުކާރުގެ އެހީތެރިކަން ހޯދަން ސިފައިން އެދުމުން ކަމަށް ވެސް މުންދު ވިދާޅުވިއެވެ.

އެ ދުވަހު ރައީސަށް މައުލޫމާތު އެރުވުމުގައި އިސްކޮށް އުޅުއްވި ސިފައިންގެ ބޭފުޅުންގެ ތެރޭގައި ނިޔާވި މަހުދީ ވެސް ހުންނެވިއެވެ.

އިޓަލީގެ ފަތުރުވެރިން ހޯދަން ފީނުމުގެ ތެރޭގައި ސިއްހީ ހާލަތު ގޯސްވެ، މާލޭގެ އޭޑީކޭ ހޮސްޕިޓަލުގައި ފަރުވާދެމުންދަނިކޮށް މަހުދީ ނިޔާވީ މިދިޔަ ހޮނިހިރު ދުވަހުގެ މެންދުރުގެ ވަގުތެއްގައެވެ. ތަރުޖަމާނު ވިދާޅުވި ގޮތުގައި މަހުދީ ނިޔާވީ ހޮސްޕިޓަލުގައި ފަރުވާދެމުން ދަނިކޮށެވެ.

މަހުދީ ނިޔާވި ހާދިސާ އަދި އިޓަލީ ޑައިވަރުން ނިޔާވި ހާދިސާ ވެސް ފުލުހުން މިހާރު ގެންދަނީ ތަހުގީގުކުރަމުންނެވެ.