ބޭރު ފައިސާއާގުޅޭ ހޮޓްލައިންއަށް 65 މައްސަލައެއް, ބިދޭސީއަކު ޑީޕޯޓުކުރަނީ

ރާއްޖޭގައި ގަވާއިދާ ޚިލާފަށް ބޭރު ފައިސާގެ މުއާމަލާތްކުރާ ފަރާތްތަކުގެ މައުލޫމާތު ހިއްސާކުރުމަށް ގާއިމްކޮށްފައިވާ ހޮޓްލައިނަށް ޓާސްކްފޯސްގެ މަސައްކަތްތަކާ ގުޅުންހުރި 65 މެސެޖެއް ލިބިފައިވާކަމަށް ދިވެހި ފުލުހުންގެ ޚިދުމަތުން މިއަދު ބުނެފިއެވެ.

މި ހޮޓްލައިނަށް ހުށަހަޅާފައިވާ މައްސަލަތަކުގެ އަދާހަމަ ހިއްސާކުރަމުން ފުލުހުން ބުނީ, މީގެތެރޭގައި ހިމެނެނީ:

1. 27 ބިދޭސީއެއްގެ މައުލޫމާތާއި
2. ހުއްދަނެތި ބޭރުފައިސާ ގަނެވިއްކުމުގެ ވިޔަފާރިކުރަމުންދިޔަ 18 ތަނަކާއި
3. ގަވާއިދާ ޚިލާފަށް ބޮޑު އަގުގައި ބޭރު ފައިސާ ގަނެވިއްކުމުގެ ވިޔަފާރި ކުރި ހަތަރު ތަނެއްގެ އިތުރުން
4. އޮންލައިންކޮށް މިފަދަ މުއަމަލާތްތައް ހިންގަ 16 ޕްލެޓްފޯމެއް ކަމަށެވެ.

މި މައުލުމާތާ ގުޅިގެން ފިވަޔަޅުތަކެއް އަޅާފައިވާކަން ފާހަގަކޮށް ފުލުހުން ބުނީ, މި މައްސަލައިގައި ބިދޭސީއަކު ޑީޕޯޓުކުރުމަށް މިހާރު އިމިގްރޭޝަނާ ހަވާލުކޮށްފައި ވަނެކަމަށެވެ. އަދި ރިޕޯޓު ލިބިފައިވާ އެހެން ފަރާތްތަކުގެ މައުލޫމާތު ކަށަވަރުކޮށް, ގާނޫނީގޮތުން އަޅަންޖެހޭ ފިޔަވަޅުތައް އެޅުމަށް ކަމާގުޅުންހުރި އިދާރާތަކާ ގުޅިގެން މަސައްކަޔް ކުރަމުން ދާކަމަށް ފުލުހުން ބުންޏެވެ.

އާންމު މަސްލަހަތާ ގުޅުންހުރި މިފަދަ ކަންކަމުގައި ރައްޔިތުންގެ ފަރާތުން ލިބޭ އެއްބާރުލުން ފުލުހުން ވަނީ ފާހަގަކޮށްފައެވެ.