ހިޔާ ފްލެޓެއްގެ ބެލްކަނީގައި ޖިންސީ އަމަލު ހިންގި ދެ މީހުން ހައްޔަރުކޮށްފި

ހުޅުމާލެ ފޭސް 2 ގެ ހިޔާ ޓަވަރެއްގެ ބެލްކަނީގައި އާންމުންނަށް ފެންނަ ގޮތަށް ބަދުއަހުލާގީ އަމަލު ހިންގި މައްސަލައިގެ ތުހުމަތުގައި 36 އަހަރުގެ ދިވެހި ފިރިހެނަކާއި 25 އަހަރުގެ ދިވެހި އަންހެނަކު ފުލުހުން ހައްޔަރުކޮށްފިއެވެ.

ފުލުހުން ބުނީ ހައްޔަރުކުރި މި ދެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން އެ މީހުންގެ ބަންދަށް 5 ދުވަހުގެ މުއްދަތެއް ކޯޓުން ދީފައިވާ ކަމަށެވެ.

މި މައްސަލައިގެ ތަހުގީގު ފުލުހުން ފަށާފައިވަނީ ހިޔާގެ 12 ވަނަ ޓަވަރުގެ ބެލްކަނީގައި އަންހެނަކާއި ފިރިހެނަކު ޖިންސީ ގުޅުން ހިންގާ މަންޒަރު ފެންނަ ވީޑިއޯއެއް ސޯޝަލް މީޑިއާގައި އާންމުވުމާ ގުޅިގެންނެވެ.

އާންމު އިޖުތިމާއީ މިންގަނޑާ ހިލާފަށް މި އަމަލު ހިންގާފައިވާ ބެލްކަނިއަކީ އެހެން ގިނަ ޓަވަރުތަކުގައި ދިރިއުޅޭ އާންމުންނަށް ސާފުކޮށް ފެންނަ ގޮތަށް ހުންނަ ތަނެކެވެ.

ރާއްޖޭގެ ގާނޫނުތަކުގެ ދަށުން އާންމު ތަންތަނުގައި ބަދުއަހުލާގީ އަމަލުތައް ހިންގުމަކީ މަނާ ކަމެކެވެ.