ފީނަން ގޮސް އުޅުނު ދުވާފަރުގެ ޒުވާނަކު ނިޔާވެއްޖެ

ށ. މަރޮށި ކައިރިއަށް ފީނަން ގޮސް އުޅުނު ރ. ދުވާފަރު ޒުވާނަކު ނިޔާވެއްޖެއެވެ.

މި ހާދިސާގައި ނިޔާވި އުމުރުން 30 އަހަރުގެ ދުވާފަރު، ލިލީމާގޭ، މުހައްމަދު ޝައްފާން ރ. އުނގޫފާރު ރީޖަނަލް ހޮސްޕިޓަލަށް ގެންދިޔައިރުވެސް ނިޔާވެފައިވާ ކަމަށް ފުލުހުން ވަނީ ކަށަވަރުކޮށްދީފައެވެ.

ފުލުހުންގެ މީޑިއާ އޮފިޝަލް މައުލޫމާތު ދެއްވި ގޮތުގައި، ފީނަން ގޮސް އުޅުނު ޒުވާނަކު ނިޔާވެގެން އުޅޭކަމުގެ މައުލޫމާތު ފުލުހުންނަށް ލިބިފައިވަނީ މިއަދު މެންދުރުފަހު 15:15 ހާއިރު އެވެ.

ދުވާފަރު ކައުންސިލުގެ ރައީސް އަހްމަދު ޝާހު މައުލޫމާތު ދެއްވި ގޮތުގައި، އެ ޒުވާނާ ނިޔާވެފައި އޮއްވާ ފެނިފައިވަނީ ށ. މަރޮށި ކައިރިންނެވެ.

ފުލުހުންގެ ތަހުގީގަށް ބޭނުންވާ ސީޓީ ސްކޭނާއި ފޮރެންސިކް ތަހުލީލުތައް ހެދުމަށްޓަކައި އެ ޒުވާނާގެ ހަށިގަނޑު މިހާރު އޮތީ އުނގޫފާރު ހޮސްޕިޓަލުގައި ބާއްވާފައި ކަމަށް ކައުންސިލް ރައީސް ވިދާޅުވިއެވެ.

ތަހުގީގުގެ މަސައްކަތްތަކަށްފަހު ހަށިގަނޑު ދުވާފަރަށް ގެންދިއުމުގެ ހުއްދައަށް އެދި ފުލުހުންގެ ފަރާތުން ކައުންސިލަށް ގުޅާފައިވާ ކަމަށްވެސް އޭނާ އިތުރަށް މައުލޫމާތު ދެއްވިއެވެ.